Aron mapalambo ang kahibalo sa komunidad bahin sa hustong pagdumala sa kwarta ug pagpalig-on sa mga panginabuhi nila, gipahigayon sa Davao de Oro State College (DdOSC) pinaagi sa Extension Services Division, inubanan sa Department of Science and Technology Regional Office XI (DOST XI), ang “Building Sustainable Community Enterprises Series 1: Basic Accounting, Bookkeeping, and Business Development Plan Validation Workshop” niadtong Hunyo 23, 2026 sa Sitio Side 4, Brgy. Mangayon, Compostela ug niadtong Hunyo 24, 2026 sa Purok 15, Brgy. Awao, Monkayo, Davao de Oro.

Gipangunahan ni Dr. April Rose Dianne A. Villaro, Extension Services Unit Head, isip resource speaker ang paghisgot sa “Kwarta nga Klaro: Basic Accounting, Bookkeeping ug Financial Accountability.” Gipasabot niya sa mga partisipante ang kahinungdanon sa transparency ug accountability sa pagdala sa pondo sa ilang mga organisasyon, ilabina sa koleksiyon sa membership fees ug pagrekord sa mga transaksiyon.

Aron masiguro ang pagsabot sa mga partisipante, nagpahigayon si Villaro og interaktibong mga kalihokan ug pangutana para mapraktis sa hustong pagrekord sa mga koleksiyon, gastuhan, ug nahibiling balanse. Gipaila usab niya ang mga bookkeeping tools sama sa Cash Receipt Journal, Cash Disbursement Journal, Membership Monitoring Sheet, ug Cash-on-Hand Monitoring.

Gawas sa pinansyal gipangunahan usab ni Dr. Jade Mark Salubre, magtutudlo sa Entrepreneurship Department sa DdOSC, ang validation sa Business Development Plan (BDP) findings pinaagi sa pagpangutana sa kahimtang sa mga panginabuhi sa komunidad. Lakip niini ang pagberipika sa presyo sa mga produktong pang-agrikultura sama sa mais ug uban pang ani aron masiguro nga tukma ug angay sa realidad sa komunidad ang mga rekomendasyon ug oportunidad sa negosyo nga gilakip sa plano.

Ang maong kalihokan kabahin sa serye sa Building Sustainable Community Enterprises (BSCEnterprises) ug gipatuman mahitungod sa DOST-GIA funded extension project nga “MICROGRIDTERPRISES in Geographically Isolated and Disadvantaged Areas (GIDA) through Community Empowerment through Science and Technology (CEST)”.