“Kung pobre atong mag-uuma, pobre pud atoang lungsod.” Mao kini ang mensahe ni Joemen M. Balico, MSc, Head sa Municipal Agriculture and General Services Office (MAGSO) sa iyang pagpakita og suporta sa pormal nga paglunsad sa Program P.U.G.A.S. (Pagpananum, Uswag, Giya, Asenso, Sugbong) pinaagi sa pagpirma sa Memorandum of Agreement (MOA) tali sa Davao de Oro State College Maragusan Branch, Barangay Local Government Unit (BLGU) New Panay, ug BLGU Tigbao, lakip ang pagpahigayon sa Training Needs Assessment (TNA) sa Barangay New Panay, Maragusan, Davao de Oro, ala-una sa hapon, Hunyo 17, 2026.

Gitambongan ang maong kalihokan sa mga opisyal sa barangay, mga mag-uuma, mga lider sa komunidad, ug mga representante gikan sa DdOSC aron opisyal nga masugdan ang programa nga nagtumong sa pagpalambo sa kapasidad sa mga mag-uuma pinaagi sa teknikal nga tabang, ug mga interbensyon nga nakabase sa aktuwal nilang panginahanglan.

Nagpahayag ug suporta si Hon. Rjmarc Pengolio, Punong Barangay sa New Panay, ug Hon. Nestor Candole, Punong Barangay sa Tigbao, alang sa mga inisyatiba nga makahatag og dugang kahibalo ug oportunidad sa ilang mga mag-uuma.

Naghatag usab og mensahe si April Rose Dianne A. Villaro, DBM, Extension Services Unit Head sa DDOSC ug representante ni Jeson N. Geroche, RAgr., PhD, Director sa Extension Services Division, diin iyang gipasabot ang pasalig sa kolehiyo sa paghatag og mga extension program nga makapalig-on sa panag-uban sa kolehiyo ug mga benepisyaryo.

Usa sa mga mahinungdanong bahin sa kalihokan mao ang pagpirma sa MOA nga nagsilbing opisyal nga kasabutan sa pagtinabangay sa tulo ka institusyon alang sa malungtarong kalamboan sa agrikultura ug komunidad. Human niini, naghatag ang mga miyembro sa maong programa ug pipila ka gagmayng gamit pang-agrikultura ug abono isip inisyal nga suporta.

Gihimo usab ang Training Needs Assessment (TNA) aron matino ang espesipikong mga kahinguhaan, kahibalo, ug kahanas nga gikinahanglan sa mga mag-uuma sa maong mga barangay. Ang resulta niini maoy mahimong basihan sa pagdesinyo ug pagpatuman sa umaabot nga mga pagbansay ug extension interventions lakup sa Program P.U.G.A.S.

Nahimong posible ang pagpatuman sa maong inisyatiba pinaagi sa pagpanguna ug dedikasyon sa mga Project Leaders nga sila si Imogene G. Landuay, Grace O. Tulang, ug Vanessa T. Compas, MPM, uban sa Program Leader nga si Sarah Jean A. Gerundio.